कधी कधी पाऊस ओव्हर hyped वाटतो, ओके वेल, जगण्यासाठी,पिकासाठी पाऊस हवाचं ,हे अगदी बिनशर्त मान्यच! पण मी बोलतेय तो हा पाऊस नाही,तो हा सगळ्यांना,विशेषतः नवकवींना आवडणारा रोमॅंटिक पाऊस!!
एक ऋतू,या पलीकडे का त्याचं कौतुक असावं? पाऊस वेळेवर आला,भरपूर बरसला की पांघरुणात दडी मारून घरी बसावं,फार वाटलंच तर चहा,भजी वगैरे चंगळ करत पावसाच्या गप्पा माराव्यात; पण हे पाऊस येणार म्हणून त्याची वाट पहाणं, उन्हाळ्याच्या शेवटाकडे जरा कुठे आकाशात चुकार ढग डोकावला,थोडं अंधारून आलं,गार वारं वाहू लागलं की पावसाचे वेध लागणं, वळवाची एखादी सर बरसली की आनंदाने वेडं होणं म्हणजे जरा जास्तचं की!
अर्थात हे खरं की वळवाच्या पावसाआधी दाटलेल्या ढगांनी वेढलेल्या संध्याकाळी मन उगाच कातर होतं, पहिल्या पावसात भिजताना मनाचं छोटं मूल होतं, रात्रभर धोधो कोसळणारा पाऊस ऐकत आतल्या आत काहीतरी सुचत जातं,एका पावसानंतर उगवलेलं कोवळं हिरवं सोनं बघून मोहरायला होतं,आणि पडलेलं कोवळं ऊन अधिकच सुखावू लागतं, कितीही ठरवलं की भिजायचं नाही तरी पाऊस भिजवतोच खरा!
मला पाऊस आवडत नाही हे एखाद्याला सांगणं अवघड पण मला पाऊस आवडतो ,हे सांगणं तितकंच सोप्प..सो हॅप्पी मान्सून..भिजा आणि भिजू द्या :)